MÖLLERFRU
Ick finn so vel woll noch tausamen. –
Herr Je, wo Di de Backen brennen!
Ick bün ’ne Fru, ick möt dat weiten,
Süh, Du geföllst mi gor nich recht,
Haddst Di man in dat Bedd ’rin leggt.
Dor wir ’t tauminst ’n beten warm.

ERZÄHLER
Un nimmt Marik dat Kind von ’n Arm
Un leggt dat in de Weig.

MÖLLERFRU
Süh söking!
Wo liggt hei nüdlich dor, Herr Jeking!
Un wo hei kickt! – Je, kik Du man!
Un wo de Hand all grippt, ach Götting!
Ne, kik doch blot mal an dat Lütting!
Hei fött sick an de Weig all an.

MARIK
Sei heww’n mi so vel Gaudes dån …!

MÖLLERFRU
Ih, red doch dorvon nich mihr, Dirn!
Ick heww s’ Di bröcht un ded’ dat girn,
Un dat ’s ’ne Weig, Du kannst mi glöwen,
So ’n deiht ’t in ’t ganze Dörp nich gewen.
Ick heww s’ noch von min Öllern kregen,
Ja, Dirn, dor heww ick sülwst in legen,
Un denn bi mi nahst all min Negen.