Un günnten uns man blot de Städ,
Un as en Minsch taum Minschen stün’n,
Denn wull’n w’ ehr Macht un Rikdaum gün’n,
Denn würd kein Arbeit uns tau swer.
Weck sälen ’t dauhn un säl’n de Lüd’
As Minschen hollen; äwerst hir!
Hir hett kein mihr en heilen Rock,
Hir is dat däglich Brod de Stock,
Un Schandwürd’ sünd hir noch dat Best.
So is uns’ Herr, so is sin Vader west.
Dat is ’ne wohre Schinnerban’n!

ERZÄHLER
As witte Duw’ un swarte Raw’,
So stimmt tausamen Herr un Slaw.
Ehr Vurtel geiht woll Hand in Hand,
Sei wahnen beid in einen Land,
Sei aten beid desülwig Luft,
Un rauhn villicht in eine Gruft;
An einen Gott, dor wen’n sei sick;
Doch Hart un Hart, dat find’t sick nich.