Krükrekrü! Dor kreiht de Håhn
up sien Wiem in ’n Stall.
Süh mal, Musche Kunkeldan,
büst du munter all?

Krükrü! Wat bedüdt dat? Kreiht
he, krükerekrü!
Na, wat dat bedüden deit,
hür wi morrn früh.

---

Ob dor wedder würr wat lütt,
ob dor liggt wen dot,
Wähldåg, de koppheister schütt,
Elenn, Humpelpot –

Ror di nich dien Ogen blind!
Lach di nich to stark!
Ständig, wo ’ne Weeg noch stünn,
Dor steiht ok ’n Sark.

---

De oll Stacker, dat lütt Gör,
Junker un Kossat,
riek, arm, dumm, klok – all een Dör,
all de sülwig Stråt.

All gliek got un all glik schlicht.
An dien eegen Schnut
fat di! Wen sin Krüz is licht?
Heiland Dod, nimm du ’t!