Kind, grip nich na de Bloemeken! -
Doa lurt dat Watemoemeken,
Wu sonn gel Mümmelk flütt.
Still is de Se doa, still un dep,
Un mennigen, de doana grep,
Koppaewe schoet he un vesoep,
As Müs’ inne Melkenbütt.

De Mümmelk stan so wit aw all,
Dat en se nich awlangen schall,
Ob en ok ment, he künn.
Nimm nich sonn oll dumm Stück di voer!
Sü, grippst du allto drist na er,
Denn wad de Kopp up ens di swer,
Denn plumpst du batsch ens ’rünn.