De Flere un de Stickelber,
Wu smuck dat an sick lett!
De hew all grote groene Blär
Un richtig an all sett;
Man aewest üns’ oll Appelbom
De reckt sick noch, as halw in Drom,
As würr doa nicks veseten,
Sloep se ok noch ’n beten.

Nu kik ens diß twe Knuppens, kik!
Sen s’ nich as Eie ut,
De hickt all hew, un wu nu glik
De Kükens krupen rut?
As ob se sülsten up sick pickt,
Un nu de Snabel rute kickt?
Wu lang will dat noch woar’n,
Is groen de hel oll Goar’n.

So licht wad mi dat un vergnoegt;
Ick wet nich, wat ick mücht –
As ob doa wat in mi sick roegt,
Wat Flünken hett un flüggt;
So het wad mi dat in ’t Gebloet,
As ob ick sülm girn Knuppens schoet,
As wir noch halw in Drom ick
Un ok sonn Oart vun Bom ick. -