Denn want ok de oll Mattinsch
Gegenaewe schrat;
Dat oll Minsch is grausam fünsch,
Un de hett sonn Prat.

Wu de dat to weten kreg,
Dat is goa ken Frag,
Dat hel Dörp tohopen schreg
Se in ken twe Dag.

---

Wat! ’n lütt beten Schawenack
Dat wir nich verloewt?
Dat bringt man Mattinsch in ’n Snack,
Wat an Spoek se gloewt.

An de Ollsch er Finste stig ’k,
Nem den Drumm as Tritt,
Klopp sacht mit de Knörr un schrig
As ’ne Ul: Kumm mit!

---

In den Katen, achteut,
Bi den Schult sin Schün
Schint as Licht dat dörche Rut –
Schüllt de up all sin?

Hisch! dat hürt sick an, mi dücht,
In de Dönsk schreg dat;
Ob doa wen in Starwen liggt,
Ob doa jung wat wad?