Martha Müller-Grählert
Ut säute Kinnertiet
Dor steiht ein ollen Flederbom,
Ik seih em noch as hüt.
Sien Telgen hüngen runner
Bet up de Ierd hendål,
Dor unner, ach dor unner
Seet ik so männig Mål.
Wenn sacht in weike Sommernacht
De Månd heruppe steech,
Un siene witte Sülwerpracht
Up Wisch un Wägen leech,
Denn ruschelt ’t dor in ´n Fleeder
So heimlich un so lies,
Un tuschelt in de Bläder
Up wunnerliche Wies.
Ik seet un lauscht un dröömt dorbi
Denn allerschönsten Drom. –
Wur säut klung doch dien Melodie
Du oller Fleederbom. –
Sei is verweiht för ümmer
Bet up denn letzten Ton,
Un nümmer wedder, nümmer
Dröm ik so säut as don.