Süh, wenn du mi nich machst un wist
un mi nich wist un machst
un achter Hans un Krischan büst
un ümmer ut mi lachst,
as ob ick dœsig wier un mall
as Hinrich sien oll Voss in ʼn Stall,
na – je denn helpt dat nich!

Un wenn du meenst, wat ik man spåß,
un dat ʼs doch all mien Iernst –
süh, denn büst du am Enn de Klås,
man dat to låt du ’t lihrnst.
Un wenn, ihrer du di dat versühst,
du nåst mit sonn lang Näs afdüüst,
na – je denn helpt dat nich!