Oll Paste Reute güng spatziren, Dat Were dat was goa to schoen, – Dunn kem doa sacht wat antofüren, Un dat was Bur Stoffe Doen. De was all werre ens to Stadt west Un kem torüch nu dick un dun, De Kaem was werre em to glatt west, Sin Snut all werre blag un brun. As he dunn ’ran kem, sär oll Reute: - Kriggt He denn, Stoffe, ni ens nog! De Predigt jidwe Mal ümgeit He, Man ni un kenen Dag den Krog! Vesteiht He sick denn nich to faten, Vesproek He mi nich fast un stiw: Wenn He dat der, He künn ’t ok laten – Un werre hett He vull dat Liw?! -