„Plattdeutsche Klassiker lesen!“
Fritz Reuter: Kein Hüsung
gekürzte Hörspiel-Fassung
Orthographie Reuter (2.Aufl. 1864) | Orthographie Herrmann-Winter 〉〉 |
Orthographie Reuter mit Übers. | Orthographie Herrmann-Winter mit Übers.
- 3 -
un richt’t sik mit ein Ruck in Enn’
un starrt ümher un folcht de Hänn’
so kurlos œwer ’t brun Gesicht,
as wenn hei nicks mihr seihn mücht.
Un har doch sünst so’n hellen Blick
so måkt för Lust un Leif un Glück.
Ach, åwer in sien jitzig Wäsen
is nicks von Glück un Lust tau läsen.
Kiekt Ein em in dat bange Ooch
un süht, dat ’t ut sien Angesicht
so tru un ihrlich ’rute lücht
un fäuhlt dat Hart, wo em dat slooch –
denn markt hei woll, denn weit hei wiss,
dat väl von Leif de Räd dor is.
Un kiekt hei ’n bäten in de Fiern
un süht de junge, witte Diern,
de langsam ’ranne wankt allein,
so blass un trurig antauseihn:
Denn weit hei ok, wer ’t dån em hett,
wer ’t Hart em hast’ger slågen lett.
Un süht hei sei so bleik un witt,
wo s’ sachting geiht denn Wech entlang,
weit hei, worüm sien Ooch so bang,
worüm dat in sien Hart so ritt.
Un neger kümmt de bleike Mågd.