„Plattdeutsche Klassiker lesen!“
Fritz Reuter: Kein Hüsung
gekürzte Hörspiel-Fassung
Orthographie Reuter (2.Aufl. 1864) 〉〉 | Orthographie Herrmann-Winter |
Orthographie Reuter mit Übers. | Orthographie Herrmann-Winter mit Übers.
- 2 -
De Rogg’ set’t an de Weiten bläuht,
Jehannsdag is ’t, de Sünn, de gläuht,
Kein Regen föllt, de Wind, de swiggt,
Dor rögt sik nich en Blatt an’n Bom,
Un up den Durn an’n Weg, dor liggt
Von ’n Heuaust her en dichten Stohm.
De blage Wepstart dröggt tau Nest –
Hei is nah Fauderhalen west –
Hei slüppt un krüppt un hüppt herüm
Un nickt un kickt sik ängstlich üm,
Un böhrt dat Köppken in de Höcht,
Ob sik de Mann villicht ok rögt,
De still dor achter 'e Steinmuer liggt,
Den einen Arm up sin Gesicht,
As wenn man ruhig slapen will.
Hei rögt sik nich, hei liggt so still,
As wir hei dod. Un allens lett,
As wir begrawen all dat Lewen.
Un 't is so bang', as wenn de Hewen
In stille Hitt en Weder brött;
Un ganz von firn, dor is 't, as wenn
Dat süfzte äwer 't Feld dorhen.
De Mann süfzt ok, sin Arm, de glitt
Herunner von dat Angesicht,
Hei grippt tau Sid un fött un ritt,
Wat hei von Gras tau hollen kriggt,