Scho aw un Strümp aw, de Bücks aewe ’t Kne,
Platschen de Jungs doa in ’n Dik;
Gos un Gant un all dat lew Ve,
Wätick un Anten toglik.

Vörrn inne Mar doa wöltern de Swin,
Borg, Saeg, Fasel un Pölk;
Un de lütt Farken, de quiken un schrin,
Un de twe Kalwe de bölk’.

Wasser de jault, den Swanz manke Ben,
Rückt in de Strümp un de Scho;
Man de lütt Dirn de sitt up ’n Sten,
Klappt inne Hänn’ un kickt to.

More de steit ünne ’t Dur doa un schelt
- Goeren, ick kam mit ’n Schacht!-
Vare de kümmt grar to Middag ut ’t Feld,
Vare de süt dat un lacht.