19. Nedderdüütsch Autorendrepen in Mölln
(Thema des Tages vom 22.02.2025)
(Pm) Düt Johr richt dat Zentrum för Nedderdüütsch in Holsteen bi de Stiften Hertogdom Loonborg, Hauptstraße 150 in Mölln, an’n 10. Mai vun Klock 10 bet 6 wedder dat bekannte Nedderdüütsche Autorendrepen ut. Autoren ut heel Noorddüütschland dörvt hier ehr nedderdüütschen Texten vördregen.
De Texten mööt ahn KI schreven sien. De Vördrag dörv maximal 10 Minuten lang sien. En Thema is nich vörgeven. Anmellen kann sik jedeen bet to’n 28. Mart. Dorför langt en E-Mail an: niederdeutschesautorentreffen@gmx.de. In de Mail mutt binnen sien: de Text, de vördragen warrt, as Textdatei; de vulle Naam; de Anschrift; Telefonnummer; E-Mail-Adress; Informatschonen över den Autor för uns Moderaters; de Angaav, of de Text op de Internetsieden vun dat Kulturportal www.kulturportal-herzogtum.de un dat Zentrum för Nedderdüütsch verapentlicht warrn dörvt (de Texten mööt dorför tietlich unafhängig un kostenfree nütt warrn dörvt.)
De Tall vun Autoren, de lesen köönt, is begrenzt. Dat Autorendrepen is nich blots för Autoren interessant, sünnern ok för all, de Lust op Kultur hebbt. Neven de verschedenen Lesens vun de Autoren gifft dat dor ok en lütt Böhnenprogramm to beleven. Deelnehmen köst nix, för Besöker is de Intritt free.