Schreibung:
Original



John Brinckman


Dat ’s grar as en dat dröppt


En Joar is kort, en Joar is lang;
Foer weck Lür, je doa löppt ’t, -
Foer anne humpelt ’t lam un krank, –
Dat ’s grar, as en dat dröppt.

De doa moet slawen Nacht un Dag,
wil dat de anne slöppt,
To don nicks brukt un ok nich mag, –
Dat ’s grar, as en dat dröppt.

Hans treckt sin Klott un makt sick krümm,
Wenn oll dumm Krischan röppt,
Un Hans hett lirt wat – na, wurüm? -
Dat ’s grar, as en dat dröppt.

Din ganze Forst schütt rank un slank,
Min enzigst Wir wad kröppt ...
Doa lett sick nicks bi don, seggt Pank,
Dat ’s grar, as en dat dröppt.

De En de kriggt ’ne güllen Kron,
De anne de wad köppt,
Un denten beir för ’t sülwig Lon, –
Dat ’s grar, as en dat dröppt.

Di bringt dat grote Loß de Jur
In ’t Hus, wil mi he schröppt,
Du warst nu Graf un ick bliw Bur, –
Dat ’s grar, as en dat dröppt.

Quelle: Vagel Grip. Güstrow : Opitz, 1859. S. 216-217.
Der Text ist zwar Korrektur gelesen, aber noch nicht endgültig redigiert. Zum Abgleich hier der originale Text: online 〉〉
Alle Gedichte des "Vagel Grip" erscheinen nach und nach auch mit einer Wort-für-Wort-Übersetzung (mit Link zum John-Brinckman-Wörterbuch).