Schreibung:
Erstdruck (1859) 〉〉 Erstdruck mit Übersetzung 〉〉 Orthographie Herrmann-Winter
John Brinckman
Sacht Råt!
wat büst du schier un glatt!
Dor wasst woll schönen Klewer
dor in ’e Koppel, wat?
Wo stur kannst du di steilen!
Wat settst du, flink un blind
hen œwer Schleet un Rick un Tun,
so licht as Frühjohrswind!
Wat hest für dralle Been du,
wu dull sleihst achter ut!
Wat büst du krœnsch un wählig
un pruust so mit dien Schnut!
Sacht Råt! Mien oll lütt Fåhlen,
sacht Råt! Wu ball, wu ball –
süh, denn so kümmt de Winter,
un denn kümmst up ’n Stall.
Nåst kam se mit de Ägen,
mit Håken un mit Plooch,
Schwäp, Sådel, Tom un Sälen,
denn warst du fråm genooch.
Denn geiht di ’t an ’e Knåken,
gifft ’t man ’n sträken Fatt;
denn kåmen Kropp un Schiebel
un Muk un Gall un Spatt.
Sacht Råt! Mien oll lütt Fåhlen,
sacht Råt! Wo ball, wo ball –
süh, denn so kümmt de Winter,
un denn warst up du stallt!